E-Wallet என்றால் என்ன? அதன் பயன்கள் என்ன?

images

இன்றை இந்திய மக்கள் தொகையில் சரிபாதி அளவுக்கும் அதிகமாக மக்கள் வங்கியில் டெபிட் கார்டினை பயன்படுத்துகின்றனர்.  இதன் மூலம் பண பரிவர்த்தகம் எளிதில் நடக்கின்றது. வங்கியின் நீண்ட நேர கியூவில் நின்று பணமெடுப்பதோ அல்லது மாற்றம் செய்வது அல்லது டெபாசிட் செய்வதோ இன்று நினைத்து பார்க்க முடியாது.

ஏடிஎம் மெஷினில் பணம் எடுக்க இன்று கியூவில் நிற்கின்றார்கள்.  இதனால் ரிசர்வ் பேங்க E-Wallet என்ற கொள்கையை அறிமுகப்படுத்தியது.  இதன் மூலம் வங்கி பண வர்த்தகம், மொபைல் போன் ரீ சார்ஜ் மற்றும்  ஆன் லைன் பேமன்ட் (Online Payment )  ஆகியவைகள் செய்து விடலாம்.

இதனால் பணம் எடுப்பதற்கான நீண்ட வரிசைகள் தேவை யில்லை.  மாதச் சம்பளம் கூட நேரடியாக நமது கணக்கில் சேர்த்துவிட்டால் எளிதாக பணத்தை நாம் மற்றச் செலவுக்கு ( டெபாசிட் ) பணத்தை செலுத்த கூட வங்கிக்கு அல்லது ஏடிஎம் க்கு செல்லாமல் இருந்துவிடலாம்.

ஆக்ஸிஜன், சிட்ரஸ், சில்லர், மொபிவிக் என இ-வேலட் சேவை தரும் நிறுவனங்களின் எண்ணிக்கை தொடர்ந்து அதிகரித்து வருகிறது.

இ-வேலட்டினால் என்ன பயன்கள்: 

இ-வேலட்டினால் வாடிக்கையாளர்களுக்கு பல்வேறு பலன்கள் கிடைக்கும். அதில் சிலவற்றைப் பார்ப்போம்.

1. போன் ரீசார்ஜ், டிடிஹெச் ரீசார்ஜ் போன்ற சேவைகள் இவேலட்கள் மூலம் எளிமையாகவும், அதிவிரைவாகவும் கிடைக்கின்றன.

2. பர்ஸ் கொண்டு போகவேண்டும் என்கிற அவசியம் இல்லை. பர்ஸ் கொண்டு போகும்போது தொலைந்துவிட்டாலும் இவேலட்டில் இருக்கும் பணத்தைப் பயன்படுத்திக் கொள்ளலாம்.

3. இ-வேலட்களின் மூலம் ரயில் மற்றும் பஸ் டிக்கெட்களுக்கான கட்டணத்தை செலுத்தும் போது வங்கியின் பணப்பரிமாற்றக் கட்டணத்தை விட சற்றுக் குறைவாக வசூலிக்கப்படுகிறது. இந்தச் சலுகை ஒவ்வொரு இவேலட்டுக்கும் மாறுபடுகிறது. உதாரணமாக, பேடிஎம் மூலம் ஐஆர்சிடிசி டிக்கெட் எடுக்கும்போது செலுத்தும் தொகைக்கு 1.5 சதவிகிதமே பரிமாற்றக் கட்டணமாக வசூலிக்கப்படும். (அதாவது, 1,000 ரூபாய்க்கு ரூ.15).

4. ஏடிஎம் இயந்திரங்களைத் தேடி அலைந்து பணம் இல்லை என்கிற கவலை வேண்டாம்.

5. பொருட்களை வாங்க அல்லது சேவையை பயன்படுத்த சாதாரண கட்டணங்களைவிட கூடுதல் தள்ளுபடி, கேஷ்பேக் போன்ற சலுகைகள் கிடைக்கும்.

6. நம் வங்கிக் கணக்கு விவரங்களை நம் இவேலட்டை தவிர, வேறு எதிலும் பதிவு செய்ய வேண்டாம்.

இவேலட் நிறுவனங்களுக்கான நன்மை:

வாடிக்கையாளர்களுக்கு அதிக நன்மை தரும் இ-வேலட் வசதியை தருவதினால் அதை நடத்தும் நிறுவனங்களுக்கு என்ன நன்மை கிடைக்கும்?

1. இ-வேலட்டை பயன்படுத்துபவர்களின் எண்ணிக்கை அதிகரிக்க அதிகரிக்க, விளம்பரத்தின் மூலம் வரும் வருமானம் அதிகரிக்கும்.

2. இந்த நிறுவனங்கள் வாடிக்கையாளர் களிடமிருந்து வாங்கும் தொகையை ஒரு வங்கிக் கணக்கில் வைப்பார்கள். வைக்கும் தொகைக்கு இ-வேலட் நிறுவனங்களுக்கும், வங்கிக்கும் இடையில் உள்ள ஒப்பந்தத்தின்படி 4% – 6% வரை இ-வேலட் நிறுவனங்களுக்கு வட்டி வழங்கப்படும்.

3. இன்று பேடிஎம் போன்ற இ-வேலட் நிறுவனங்கள் ஃப்ளிப்கார்ட், அமேசான் போன்ற இ-காமர்ஸ் நிறுவனங்களாக தங்களை உயர்த்திக் கொண்டு வருகின்றன.

இந்த இ-காமர்ஸ் நிறுவனங்கள் மூலம் வாங்கும் பொருட்களுக்கு 10% – 30% (சில சமயங்களில் 50% கூட) வரை கேஷ் பேக் என்று அறிவிக்கிறார்கள். இந்த கேஷ்பேக் சுமார் ஆறு மாதங்களுக்குப்பின்தான் வழங்கப்படுகிறது. அந்த ஆறு மாதத்தில் இந்தப் பணத்தின் மூலம் வியாபாரத்தை பெருக்க பயன்படுத்துகின்றன.

வாடிக்கையாளர்களுக்கு என்ன பிரச்னை:

இ-வேலட் மூலம் வாடிக்கையாளர்களுக்கு பல நன்மைகள் கிடைத்தாலும் சில பிரச்னைகளும் கூடவே வரத்தான் செய்கிறது.

1. சமீப காலமாக, டெபிட் கார்டு மற்றும் கிரெடிட் கார்டுகள் மூலம் பணப்பரிமாற்றம் மேற்கொள்ளப்படு கிறது. இந்த தருணத்தில் இ-வேலட் போன்ற சேவைகள் மெட்ரோ நகரங்களைத் தவிர, மற்ற இடங்களில் அதிகம் நடைமுறைக்கு வரவில்லை.

2. ஒரு வங்கிக் கணக்கு மூலம் வேறு வங்கிக் கணக்குக்கு பணம் செலுத்துவது போன்ற வசதி இ-வேலட்களில் தொடக்க நிலை யிலேயே இருக்கின்றன. பணம் செலுத்தும் வசதியை இ-வேலட்கள் வழங்கி இருந்தாலும், அதற்குக் கட்டணம் வசூலிக்கப்படுகிறது.

உதாரணமாக, ஆக்ஸிஜன் வேலட்டில் இருக்கும் பணத்தை நம் வங்கிக் கணக்குக்கு மாற்ற வேண்டும் என்றால் பரிமாற்றம் செய்யும் தொகையில் 3% அல்லது 5 ரூபாய், இதில் எது கூடுதலோ அந்த தொகை கட்டணமாக வசூலிக்கப்படுகிறது.

3. பெரும்பாலான இ-வேலட்களில் முன்கூட்டி செலுத்தப்படும் தொகை மீண்டும் நம் வங்கிக் கணக்குக்கு திருப்பி அனுப்ப முடியாதபடி இருக்கிறது. முன்கூட்டி செலுத்திய பணத்துக்கு இ-வேலட் நிறுவனம் ஒப்பந்தம் செய்திருக்கும் நிறுவனத்தின் சேவைகளை அல்லது பொருட்களை வாங்கிக்கொள்ள வேண்டிய கட்டாய சூழ்நிலை இருக்கிறது.

4. மாதம் ஒன்றுக்கு பணப் பரிமாற்றம் மேற்கொள்ளக்கூடிய தொகை மிகக் குறைவாக இருக்கிறது. அதோடு ரீசார்ஜ், பில்களை செலுத்துவது, டிடிஹெச் போன்ற சேவைகளையும் ஒரு குறிப்பிட்ட அளவுக்கு மேல் செய்ய முடியாது.

உதாரணமாக, ஆக்ஸிஜன் வேலட்டில் மாதம் ஒன்றுக்கு அதிகபட்ச பரிமாற்றத் தொகை ரூ.10,000; ஒரு முறைக்கான அதிகபட்ச தொகை ரூ.5,000.

5. வாடிக்கையாளர்கள் செலுத்தும் பணத்துக்கு வட்டி கிடைக்காது.

இந்தியாவில் இ-வேலட்களை பயன்படுத்துவோரின் எண்ணிக்கை, டெபிட் கார்டு வைத்திருப்பவர்களில் சுமாராக 16 சதவிகித அளவில்தான் உள்ளனர்.

நடுத்தரக் குடும்பங்களுக்கு தேவையான பணத்தைக்கூட பரிமாற்றம் செய்ய இயலாத வகையில் இ-வேலட்டின் பணப் பரிவர்த்தனை அளவுகள் நிர்ணயிக்கப்பட்டுள்ளன. இவேலட் நிறுவனங்கள் நாம் செலுத்தும் பணத்தின் மூலமாக கிடைக்கும் வட்டியை வைத்தே பெரிய அளவில் லாபத்தை சம்பாதிக்கின்றன. இ-வேலட் என்பது ஏடிஎம் இயந்திரங்களுக்கு விடை கொடுக்கும் விதத்தில் ஒரு நல்ல முயற்சிதான். ஆனால், இ-வேலட் நிறுவனங்கள் குறைந்தபட்சம் இந்தியாவில் இருக்கும் டாப் 20 வங்கிகளோடு இணைந்து செயல்பட்டு வங்கிப் பணப் பரிவர்த்தனையைவிட, குறைந்த செலவில் பணப் பரிவர்த்தனைகளை வழங்கினால் மட்டுமே வங்கித் துறையை முழுமையாக தன் வசமாக்க முடியும்.

தற்போது இருக்கும் இ-வேலட் நிறுவனங்கள் பேடிஎம் நிறுவனத்துக்கு பேமென்ட் வங்கியை நிறுவ ரிசர்வ் வங்கி அனுமதி அளித்திருக்கிறது. வருங்காலத்தில் பேமென்ட் வங்கிகளாக செயல்பட பிற இவேலட் நிறுவனங்களும் விண்ணப்பிக்கலாம் என ஆர்பிஐ தெரிவித்திருக்கிறது.

ஆர்பிஐயிடம் இருந்து பேமென்ட் பேங்கிங் அனுமதி கிடைத்தால், அந்த நிறுவனங்களின் சேவை பன்மடங்கு உயரும். இதனால் பணப் பரிமாற்றம் செய்ய வங்கிகளை மட்டுமே நம்பி இருக்க வேண்டிய கட்டாயம் மக்களுக்கு இல்லாமல் போகும் அல்லவா?

இந்த முயற்சியை பெரிதளவில் பயன்படுத்தி இன்னும் கொஞ்சம் வங்கிகள் ஒத்துழைக்க வேண்டும் மற்றும் மக்களைக் கவர இன்னும் அதிகமாக Option களை வழங்க வேண்டும்.

Leave a Reply

Your email address will not be published.